Монгени

             Монгол оронд нийгмийн тогтолцоо өөрчлөгдөж, зах зээлийн эдийн засагт шилжиж  байсан цаг дор боловсролын салбар ч өөрчлөлт шинэчлэл үгүйлэгдэж эхэлсэн юм. Уламжлалт хэлбэртэй дунд сургуулийн технологийг хэрхэн өөрчлөх вэ? Шинэчлэл хэрэгтэй байна … гэх үгс цухалзан өөрчлөлтийг хүсэн хүлээж байх энэ үед боловсролын салбарт нэгэн шинэ зам, нэгэн шинэ түүхийн хуудсыг нээж “Монгени -21” төсөл эхэлж байсан цаг саяхан мэт санагдана.

             30 гаруй жилийг ардаа орхижээ. Алдаа оноо, амжилт дагуулсан он жилүүдэд боловсролын салбарт шинэчлэлийг хамтдаа түүчээлэн ирсэн нь үе үеийн багш нарын маань нөр их хөдөлмөр, оюун ухааны бүтээл юм. Монголын боловсролын түүхэнд цоо шинэ хуудас нээсэн 30 гаруй жилийнхээ өндөрлөгөөс эргэн харахад хүүхдийн төрөлх авьяасыг хөгжүүлж, монгол хүүхдийг төлөвшүүлэх, монгол сургуулийнхаа дүр төрхийг бий болгож, үндэс суурийг нь тавьсандаа баяртай байна.

             Монгол Улс он удаан жил оршин тогтнохын үндэс нь монгол хүүхдийг хөгжүүлэх, монгол ухаанд сургаж, жинхэнэ монгол сургуулийг бий болгох хэрэгцээ шаардлага өнөөгийн амьдралаас урган гарч ирлээ. Монгол Улсын түүхийн он оны буурал хуудсанд монгол үнэр арилахгүй шингэж байх үндэс нь хүүхдийг монгол ахуйд сургаж, монгол иргэнийг төлөвшүүлэх шаардлага өнөөгийн боловсролын салбарт үгүйлэгдэж байна.

              Уламжлалт сургалтын сул талыг засах зорилготой хувилбарт сургалттай, уламжлалт биш технологитой Монгени Сургуулийг босгож чадсан. Ямар ч цаг үед шантралгүй нэгэн бат болж, нэгэн үйлийн төлөө зүтгэж, олон шинэ төсөл хөтөлбөрүүдийн ард гарч чаддаг оюунлаг, чадварлаг, бүтээлч багш, ажилчидтай.

              Хүүхдийн инээд, баяр баясгалан дагуулан жингэнэх мөнгөн хонхны дуу та бидний сэтгэлд мөнхөд хоногшин, гэрэл гэгээг бэлгэдэн эгшиглэж байхын өлзийт ерөөлийг дэвшүүлье.